Orlofsmál

Allt launafólk á rétt á orlofi samkvæmt lögum og kjarasamningum. Starfsmaður ávinnur sér rétt til orlofs með vinnu fyrir atvinnurekanda á svokölluðu orlofsári, sem er tímabilið frá 1. maí til 30. apríl ár hvert. Samkvæmt lögum, skal veita orlof í einu lagi á tímabilinu frá 2. maí til 15. september, nema um annað sé samið. Lágmarksorlof er tveir orlofsdagar fyrir hvern unninn mánuð.

Orlofslaun eru greidd  í samræmi við áunninn rétt til orlofs á árinu og reiknast á hverja launagreiðslu, þannig að af heildarlaunum reiknast orlofslaunahlutfall viðkomandi starfsmanns, að lágmarki 10,17%.

Með hækkandi starfsaldri ávinna starfsmenn sér rétt til hærra hlutfalls og fleiri frídaga.

Orlofsuppbót

Orlofsuppbót er eingreiðsla sem atvinnurekendum ber samkvæmt kjarsamningi að greiða starfsmönnum sínum ár hvert í tengslum við orlofstöku þeirra. Orlofsuppbótin er mishá eftir kjarasamningum.

Orlofshús og íbúðir

Stéttarfélag Vesturlands býður félagsmönnum sínum orlofsíbúðir á Akureyri og í Reykjavík til leigu á sanngjörnu verði en einnig sumarhús í Húsafelli og Ölfusborgum.

Eftirfarandi reglur gilda um alla orlofskosti og eru gestir vinsamlegast beðnir um að virða þær:

  • Reykingar eru stranglega bannaðar í orlofsíbúðum Stéttarfélags Vesturlands.
  • Leigutaka er óheimilt að framselja leigusamninginn án samþykkis félagsins.
  • Ekki er leyfilegt að hafa gæludýr í orlofsíbúðum félagsins nema í Kiðárskógi 1.
  • Helgarleiga í öllum íbúðum og sumarhúsum félagsins tvær nætur, vilji félagsmaður nýta þrjár nætur er það greitt að fullu í samræmi við verðskrá.
  • Hafi félagsmaður bókað og greitt fyrir íbúð með meira en tveggja mánaða fyrirvara og geti svo ekki nýtt sér leiguna, þá er honum endurgreitt að fullu óski hans þess áður en 60 dagar eru í leigudag.
  • Ef minna en 60 dagar eru að leigudegi, er íbúðin losuð á vefnum og auglýst á heimasíðu félgasins. Náist að leigja húsið/íbúðina á næstu 50 dögum, fæst endurgreitt að fullu. Eftir 50 daga, þ.e. þegar minna en 10 dagar eru í útleigu fæst ekkert endurgreitt.
  • Félagsmaður sem óskar eftir því að nýta ekki bókunarkerfið Frímann og vill bóka með aðstoð starfsmanna félagsins, þarf að ganga frá greiðslu samdægurs. Gerist það ekki er afbókað að morgni næsta vinnudags.

Til að panta og sjá hvað er laust er best að nýta sér orlofshúsavefinn okkar sem er að finna hér

Ýmsir aðrir kostir

Gisting innanlands að eigin vali – ekki hótelmiðar!
Greiðum niður gistinótt um kr. 10.000 hámark 70.000 á ári. Með því að koma með löglegan reikning stílaðan á nafn og kt félagsmannsins á skrifstofu félagsins er hægt að fá endurgreiðslu á hótelgistingu innanlands eða erlendis. Endurgreitt er 50% af reikningnum en aldrei meira en 10.000.-

  • Félagsmaður sem greiðir 50% af viðmiðunariðgjaldi eða meira fær fulla endurgreiðslu.
  • Félagsmaður sem greiðir undir 50% af viðmiðunargjaldi fær hálfa endurgreiðslu.

Greitt er 50% af kostnaði, eða 25% af kostnaði

Viðmiðunargjald vegna 2024 er 48.000.-

Gullklúbburinn er nýr kostur sem nú stendur félagsmönnum til boða. Orlofssjóður félagsins hefur nú gengið í Gullklúbbinn og stendur félagsmönnum því til boða að gista á Gullklúbbskjörum á nokkrum hótelum í Reykjavík og víðar, þetta eru Grand hótel og Fosshótel. Afslættir fást einnig af mat og ýmiskonar þjónustu. Sýna þarf félagsskírteini og geta þess að félagið sé aðili að Gullklúbbnum þegar bókað er. Félagsskírteini er hægt að prenta út af orlofsvefnum hér

Veiði og útilegukort eru til sölu hjá Stéttarfélagi Vesturlands. Kortin eru seld orlofsvef félagsins hér og eru verulega niðurgreidd.

Með Herjólfi á hálfvirði!
Nú liggja leiðir um Landeyjahöfn!
Félagsmenn í Stéttarfélagi Vesturlands geta nú skotist til Vestmannaeyja með Herjólfi á hálfu gjaldi.
Til að koma í veg fyrir að verið sé að bóka ferðir sem e.t.v. eru svo ekki farnar, þá höfum við þann hátt á eins og í mörgu öðru að félagsmaður þarf að leggja út fyrir fargjaldinu en kemur svo á skrifstofuna þegar hann hefur farið í ferðina og fær endurgreitt. Koma þarf með reikning, eða greiðslukvittun úr bókunarkefi Herjólfs þar sem fram kemur nafn og kennitala félagsmannsins. Endurgreiðslan gildir fyrir félagsmanninn ásamt fjölskyldu og fjölskyldubíl. Ekki þarf að sækja um þennan kost fyrirfram.
Nú er um að gera að drífa sig til Eyja!

  • Var efni síðunnar hjálplegt?
  • Nei