Nú kl. 12 hófst verkfall félagsmanna sem starfa eftir kjarasamningum Starfsgreinasambands Íslands og Samtaka atvinnulífsins, bæði eftir almenna samningnum og eins eftir samningi um veitinga-, gisti-, þjónustu- og greiðasölustaðir, afþreyingarfyrirtækja og hliðstæðrar starfsemi. Allir félagsmenn sem starfa eftir þessum tveimur samningum áttu þá að leggja niður störf. Þeir starfsmenn sem eru í öðrum stéttarfélögum en starfa innan félagssvæðisins í störfum sem samið er um í kjarasamningi SGS og SA eiga líka að vera í verkfalli. Þeir eru sannanlega að sinna störfum sem verkfallið nær yfir.
Verkfallsverðir verða á ferð á öllu félagssvæðinu, í Borgarbyggð , Búðardal og í Hvalfjarðarsveitinni á meðan verkfall stendur yfir, eins verða opnar verkfallsmiðstöðvar á skrifstofum félagsins. Stéttarfélag Vesturlands hvetur félagsmenn sem eru í verkfalli til að sýna samstöðu og mæta og einnig að taka þátt í verkfallsvörslu.
Þeir félagsmenn í stéttarfélögum sem vinna á öðrum félagssvæðum sem eru ekki í verkfalli leggja ekki niður störf. Verkfallið takmarkast af landfræðilegu svæði þeirra aðildarfélaga sem eru í verkfalli og þeim kjarasamningum sem verið er að semja um.
Þó að ferðaþjónustubændur séu í Bændasamtökunum þá er kjarasamningur SGS og Bændasamtakanna bara um starfsmenn sem vinna almenn landbúnaðarstörf á bændabýlum. Ferðaþjónusta bænda fellur undir ferðaþjónustusamninginn, starfsmenn þar taka laun samkvæmt honum og eru því í verkfalli.
Grunur um verkfallsbrot
Ef félagsmenn Stéttarfélags Vesturlands verða varir við verkfallsbrot eru þeir vinsamlegast beðnir um að hafa samband við einhverja skrifstofu félagsins í síma 430 0430 Einnig er hægt að hringja í Signýju formann í síma 894 9804 eða Sigurþór varaformann í síma 862 6221